Veðurfréttir - Cyclone Daman

Þessa stundina er ofsaveður á ferð um Suðurhöfin. Það er hægt að fylgjast með því hér.

Veðrið er að koma að Fídjíeyjum, á nettum 15km/klst hraða. Fólk á ákveðnum svæðum hefur verið hvatt til að koma sér upp byrgðum af dósamat og vatni og allmennt undirbúa sig undir mögulegar hamfarir.

Við hér í Suva á suðauðstur horni Viti Levu ættum að sleppa, og jólaveislu þeirra á svæðaskrifstofu UNDP hefur ekki verið aflýst. Ég fæ að sniglast inn í þá veislu í kvöld, enda er ég oft á tíðum eitthvað að stússast með fólkinu sem vinnur þar. Ég þarf bara að finna mér einhverja rauða/græna flík .....

Globalrichlist

Ritstjóri síðunnar telur að það megi snúa sér að eilítið léttara hjali.
Endilega kíkið á þessa vefsíðu, og veltið vöngum. Velt velt.

Murder (?)

Á sunnudagsm0rgunn, hér í Suva, fannst maður látinn á veröndinni sinni, með stungusár í hjartastað. Fyrstu fréttir voru þær að að maðurinn hefði stungið sjálfan sig í hjartað (!), en núna er vafi kominn í það mál.

Þeir Jioje, Douglas og Wilson hafa fylgst með því að allt sé með kyrrum kjörum í kringum bygginguna sem ég bý í, einn á vakt í einu. Þetta eru óskup ljúfir menn, og oft er rabbað um menn og málefni þegar ég kem og fer. Þeir þekkjast allir frá barnæsku, höfðu svo farið og siglt um heimsins höf á ýmsum farskipum, en eru núna allir aftur komnir með báða fætur á skerið sitt Fiji, og lifa hefðbundu fjölskyldulífi auk þess að vera í nokkuð tíðindalausu starfi.

Núna eru þeir bara tveir eftir. Jioje er dáinn.

One of the guards at my place is dead.

Assassination plot (?)

Það er lögreglustöð í miðbænum, beint á móti vinnunni. Hún stendur á bletti á milli fjögurra gatna. Frá laugardegi og fram í miðja þessa viku voru hliðargöturnar tvær lokaðar. Svona ráðstafanir eru aldrei gerðar í kringum þessar byggingar, en núna hafði herinn víst handtekið nokkra einstaklinga sem taldir eru stórhættulegir, og voru þeir tímabundið í haldi á þessari lögreglustöð. Aðalmaðurinn var þó bara dagspart þar, því hann slasaðist þegar hann var handtekinn. Núna viku síðar liggur hann enn á sjúkrahúsi, .. m.a. kjálkabrotinn.

Það eru ýmsar áhugaverðar flækjur í málinu. Aðalmaðurinn, sem er fæddur og búsettur hér á Fíji , er nýsjálenskur ríkisborgari. Kunningjar mínir í sendiráði Nýja Sjálands hafa því undanfarna daga dustað rykið af Vínar sáttmálanum, svarað fyrispurnum frá fjölmiðlum, og núna í lok vikunnar líka fengið að fara í sjúkrahúsheimsóknir.

Já, málið er víst það, að hópur manna er sakaður um að hafa ætlað að drepa mann og annan, já svona eins og hálfa ríkisstjórnina. Þetta eru nýjustu fréttirnar:

"The 11 accused persons who were charged over their involvement in the alleged plot to overthrow the Interim Government & military, hence assassinate the Commander and a number of Cabinet Ministers and military personnel’s, have been remanded in custody until 12th December for their next court sitting. Their request for bail have been refused."

More news on this matter can be found through the Fiji newslinks on the sidebar, and on also on the BBC web

Fótbolti og stjórnmál

Undankeppni FIFA fyrir Heimsmeistarakeppnina í fótbolta 2010 er í góðum gír. Hér í Kyrrahafsdeildinni voru leikir Nýja Sjálands og Fídjíeyja á dagskrá fyrir stuttu. Heimaleikur Fídji fór fram, en ekki sá á Nýja Sjálandi.

Ástralía, Nýja-Sjáland , Bandaríkin, og reyndar líka Japan (án þess að auglýsa það of mikið) hafa öll ákveðið að fólk sem starfar fyrir herinn eða er í lykilstöðum í núverandi stjórn Fíji og nánir ættingjar þess, geta ekki fengið vegabréfsáritanir inn í þessi lönd.

Nú, og þannig er mál með vexti að tilvonandi tengdafaðir markmanns Fidjí liðsins vinnur fyrir her Fídjí, og gat hann því ekki fengið vegabréfsáritun (.. markmaðurinn sumsé).

Fidjiliðið var víst tilbúið að leika í Nýja-Sjálandi án markmannsins, en þó ekki án þess að kvarta. FIFA tók þá ákvörðun að heimaleik Nýja-Sjálands yrði aflýst því ekki á að blanda saman stjórnmálum og fótbolta. Það er enn ekki búið að ákveða hvort að leikurinn eigi að fara fram í “hlutlausu landi” eða Fídjí verði dæmdur sigurinn.

Fjórðungsúrslitin

Ruðningslið Fídjí kom súperkátt heim frá Rugby World Cup (.. ja þ.e. helmingurinn sem býr á Fídji) og fékk hetjumóttökur þrátt fyrir að hafa tapað leiknum gegn Suður-Afríku í fjórðungsúrslitunum.

Fréttir af fyrsta leiknum í fjórðungsúrslitunum fengu göngugarpar (sjá að neðan) að morgni dags frá þorpshöfðingjanum í Nagatagata, þar sem gist var fyrstu nóttinna. Hann hafði sumsé hlustað á úrvarpið um nóttina. Ástalía tapaði, og þóttu það merkar fréttir. Fréttir af næsta leik komu nokkrum stundum síðar, stuttu eftir leikslok, frá bónda mjög svo fjarri alfaraleiða, sem lumaði líka á útvarpi. Nýja Sjáland tapaði, og þótti það enn merkilegra. Þriðji leikurinn var leikur Fídjí , og vildi svo vel til að þorpið sem við gistum í þá nóttina, Nubautauta, lumar á rafal svo menn gátu séð leikinn (.. já og líka sjónvarpi, og vel löngu sjónvarpsloftneti upp á hæð fyrir ofan þorpið).

Í Nubautauta* er annars ekkert rafmagn, né símasamband, og græjan sem tekur á móti útvarpssendingum er biluð, já og tæp dagsganga að næstu þorpum í norður og suður. en að öðru leiti allt til alls til að vera til, eins og ræktarland, ferskvatnsá og þess háttar.

Nú, aftur að rafalnum. Hann er borinn á mikilvægum stundum upp á hæðina fyrir ofan þorpið, og sjónvarpið líka. Þetta var í annað skiptið sem Fidjí komst í fjórðungsúrslitin (..það virðist alltaf gerast stuttu eftir stjórnarbyltingar) og því mikilvægt að fylgjast með þessum stórviðburði. Okkar menn töpuðu gegn S-Afríku, en spiluðu vel, og er það sem skiptir mestu máli hér á þessum enda. Fóru því þorpsbúar og gestir eftir leikinn nokkuð kátir niður stígalausa hæðina um miðja nótt í niðamyrkri, og gerðist það nokkuð áfallalaust. Hver vann fjórða leikinn skipti okkur svo engu máli.

Nú í öllu falli þá vann Suður-Afríka keppnina, Fídjíliðið er meira en sátt við sitt .... og þar með líkur fréttum af ruðningsbolta, í bili.

*) Nubautauta er nánast á miðri Viti Levu eyjunni, og er helst þekkt fyrir að þar drápu menn og átu kristniboða fyrir margt löngu. Það var áður en Fídjíbúar hættu að vera mannætur og gerðust kristnir, ....eða þannig hljómar amk söguskýring þorpsbúanna.

Helgardagskráin

Fjórðungsúrslit í Heimsmeistaramótinu í ruðningsbolta verða í sjónvarpinu í beinni um helgina. Þjóðarsálin verður víst öll samstillt þegar Fídjí leikur gegn Suður-Afríku á sunnudagsmorgunn.

Þjóðhátíðardagur Fídjí er miðvikudaginn 10. október. Hann er "færður" fram á mánudaginn og hátíðarhöld munu standa yfir alla helgina, t.d. í gömlu höfuðborginni Levuka, á Ovalau eyjunni ( austur of litlu Caqalai eyjunni fyrir þá sem þekkja til) .

Hópur fólks mun fara í 3ja daga rölt þvert yfir hálendi Viti Levu, frá norðri til suðurs. Hópurinn mun njóta gestrisni fólks í tveimur afskekktum þorpum á milli þess sem gengið er eftir nokkrum fjallahryggjum, valhoppað niður eftir löööngum dal og vaðið yfir tvær tylftir áa.

Disasters Game

http://www.stopdisastersgame.org/

UN/ISDR (International Strategy for Disaster Reduction) has developed an on-line disaster simulation game called Stop Disasters !

It may be useful for training and awareness raising activities on disasters, ... well and also just for fun. Do check it out !

Regnhlífar og rigning

Ég á regnhlífar, já ekki eina litla netta sem kemst fyrir í bakpoka, ó nei, heldur þrjú stykki sem eru meira í átt við göngustafi en eitthvað annað. Eina keypti ég, aðra fékk ég gefins frá UNDP og þá þriðju gleymdi einhver heima hjá mér. Það er sumsé alltaf ein við höndina: í bílnum, í vinnunni og heima. Þessa dagana er þó best að hafa eina alltaf með sér.

Í tvær vikur hefur rignt og rignt hér í Suva, svona dæmigerðu hitabeltis úrhelli, með smá hléum öðruhverju. Veðurupplýsingar frá BBC sýna að næstu daga heldur rigningin áfram. Nú en reynslan frá í fyrra segir mér að þess mikla rigning haldi áfram í nokkuð margar vikur til viðbótar.

Ekki kvarta ég, verandi svona afskaplega vel útbúin. Það er annað en í fyrra þegar mér leið eins og í stofufangelsi, með lítið regnhlífarkríli sem gerði mest lítið gagn, og ekki búin að skapa samband við hverfisleigubílastöðina sem núna sendir bíl til mín um leið og ég hef sagt : Bula, this is Helga Bára

Caqalai eyja

...er við austurströnd Viti Levu í ca klukkustundar akstri og klukkustundar bátsferð frá höfuðborginni. Eyjan er smærri en smátt, það tekur um 10 mínútur að rölta í hringinn í kringum hana. Fyrir utan eyðieyju náttúrustemningu þá lumar Caqalai á litlu öðru en mjög einföldum gististað þar sem matmálstímar eru tilkynntir með blæstri í kuðung, og þar er ekkert við að vera nema að vera til, spila blak með tylftinni sem býr og starfar á eyjunni, skreppa með þeim í messu á næstu eyju, já og líka fljóta um með köfunargleraugu og öndunarpípu og skoða marglita kórala, og líka stóra og smáa marglita fiska, svona eins og þá í myndinni "Finding Nemo". Þetta er alveg magnaður staður. Myndir úr helgarferðinni birtast fljótlega.

16.september 2007

Það er víst merkis dagur, þessi 16. september. Hér á Fídjíeyjum mun her manna ganga um í heila viku til að komast að því hvar hver og einn var þennan dag, og með hverjum, já sumsé sérstaklega hvar fólk gerði sig heimakært.

Ekki hefur enn verið bankað upp á hjá mér, en þar sem sunnudagar eru miklir kirkjudagar þá byrjar verkið líklega ekki fyrr en á morgun. Ekki er hefð á þessum bæ að fara til kirkju, en fyrri partinum var á hinn bóginn eytt heima í risinu þar sem nokkrir “nýjir” og “gamlir” vinir komu í brunch. Það stendur til að skapa hefð úr því. Það rigni ekki svo við héldum okkur til á svölunum. Svo stoppuðum við á mánaðarlega götumarkaðinn hér í Suva, - áður en nokkur af okkur keyrðum rétt út fyrir borgina til að vaða upp straumlitla á og synda við foss í henni. Óskup ljúft. Nú, þegar heim var komið aftur eyddi ég dágóðum tíma í að gera hluti fyrir vinnuna, - og nei, það stendur ekki til að skapa hefð úr því.

En já, það er sumsé manntalsvinna í gangi hér í Fídjíeyjum, og þar sem unnið er eftir hávísindalegum aðferðum þá var ákveðið að einbeina sér að heimilisfesti fólks á þessum ákveðna degi, 16. september 2007. Þegar búið er að vinna úr gögnunum verður líka einu af fyrstu skrefunum í kosningaundirbúningi lokið. Þingkosningarnar verða væntanlega árið 2009, eða þar um bil, það fer eftir því hver er spurður .....

Nú, en hvar varst þú þann sextánda ?

p.s.
Hlýjir straumar eru sendir "norður", og þá sérstaklega til afmælisbarnsins.

Tómatamauk

Uppskrift dagsins er af tómatamauki sem indó-fídjísk vinkona mín hún Bernie kenndi mér að malla. Þetta mauk hentar vel með, jú mikið rétt, indverskum réttum, já og hverju sem er svo sem, þá sérstaklega þegar bragðminni fylgiréttir eru borðnir á borð (hrísgrjón, kartöflur, soðin grænmeti....).

Hitaðu olíu í potti, vel botnfylli. Settu slatta af heilu kúmeni og sinnepsfræjum* í pottinn svo að ekki sjáist í amk hálfan botninn, og leyfðu kryddinu að krauma í olíunni, svona á meðan þú brytjar niður lauk í smáa bita. Skelltu lauknum í pottinn og líka nokkrum smáttskornum hvítlauksgeirum. Hrærðu smá og leyfðu þessu að krauma á meðan þú skerð nokkra tómata smátt, e.t.v. 5-7 stykki. Magnið fer eftir smekk, því færri því braðgsterkara. Nú, og ef tómatavertíðin er ekki í gangi, þá má alveg nota tómata úr dós, það er ekkert svindl segir hún Bernie. Svo er ráð að skella smá slatta af einhverri karrýblöndu (hér á þessum bæ er notað masala) í pottinn áður en hitinn er lækkaður, lokið sett á og maukinu leyft að malla þar til að annað sem verið er að elda er tilbúið.

Mynd af maukinu mun birtast á síðunni næst þegar það verður eldað í risinu.

*ef sinnepsfræ eru langt undan þá er ekkert að því að skella barasta blint einhverju öðru kryddi í pottinn. Það má þá láta ritara síðunnar vita hvernig útkoman varð !

Íþróttafréttir

Kyrrahafsleikunum lauk um síðustu helgi. Síðast voru þeir hér í Suva, - já og ég svamla reglulega í stóru keppnislauginni sem byggð var af því tilefni. Í þetta skiptið voru þeir haldnir í Apía, Samóa.

Einn af merku atburðum leikanna í Samóa var að skólastelpa frá Fidjíeyjum vann 5000 metra hlaup kvenna ! Já, fimm þúsund metra hlaupið. Hún var meira að segja dágóðan spotta á undan reynsluboltanum frá Papúa Nýju Guineu sem allir héldu að myndi vinna. Og já, sú litla hljóp berfætt.

Aðrar fréttir af leikunum eru að þar hófst keppni um sæti í næstu heimsmeistarkeppni í fótbolta, nokkurs konar undan-undan-keppni um sæti frá þessum heimshluta. Það eru víst bara 1000 dagar þar til úrslitakeppnin verður haldin, svo ekki mátti draga þetta mikið lengur ;-) Já, og þessar fréttir bárust ritara síðunnar frá Norður-Atlantshafinu, enda hverfur fótboltinn algjörlega í skuggan af rugbí hér á þessum enda.

Já, því tengt, heimsmeistaramótið í rugbí fer núna fram í Frakklandi. Frakkar stórtöpuðu gegn Argentínu í opnunarleiknum. Mikið svekkelsi þar á ferðinni. Fídjí ætlar að standa sig, en okkar menn eru ekki eins góðir í hinni hefðbundnu útgáfu, eins og í sjö manna rugbí, svo ekki er stefnt á efstu sætin í þessari keppni.

Nú ár er liðið

...síðan ég flutti til Suðurhafa, og vegabréfið lumar núna á stimplum frá Fídjíeyjum, Sólomóneyjum, Ástralíu og Nýja Sjálandi, - og líka frá nokkrum löndum í Norður-Kyrrahafi: Marshall eyjum, Phonpei (einu af Sambandríkjum Micrónesíu), Palau, og einnig nokkrum frá Bandaríkjunum ( því ferðalag um Norður-Kyrrahafið krefst millilendinga í Guam og líka Hawai). Nýjasta viðbótin í vegabréfið er svo handskrifuð framlenging þar til í lok september á næsta ári á undanþágu frá vegabréfsáritun fyrir Fídjíeyjar, og næsti stimpillinn mun svo líklega vera frá Tonga.

Þetta er hópurinn sem fór í vinnuferðina til Marshall eyja, Phonpei og Palau. Íslendingur, Ástrali og þrjú stykki frá Fídjíeyjum. HBB, Charmaine Rodrigues, Patrick Tuimaleali´ifano , Virisila Raitamata og Ronald Ho. Þess ber að geta að sú lengst til vinstri hefur ekki algjörlega mist klæðasmekk sinn, hún er einfaldlega í hefðbundum fötum frá Fídjíeyjum. Það er sumsé mjög vinsælt fyrir konur að vera í blóma alklæðnað, þó sérstaklega á föstudögum. Karlar láta duga að fara í blómaskirtu.

p.s. Hlýjir straumar eru sendir til Bakkahjallans í tilefni dagsins, afmælisdagsins.